Hitz egin dezagun Europa
Europako Ikasle Txartela
Lineako prozedura errazak eta seguruak ezarri eta informazioa zuzenean ikasleen eskuara ipintzea ezinbestekoak dira Europa osoko mugikortasuna bultzatzeko. Era berean, hezkuntza eta kultur ekintzetan parte hartzea sustatzeko beharrezkoa da ere, 2025. urterako Europako Hezkuntza Espazioa sortzearen alde.
Europako Ikasle Txartelaren ekimenak, Erasmus+ mugikorretarako aplikazioaren bidez, lineako leihatila bakar bat sortuko du, ikasleek beren mugikortasun aldiari lotutako prozedura administratiboak linean egin dezaten, aurretik, bitartean eta egonaldiaren ondoren. Horri esker, behar duten informazio guztia aurki dezakete, atzerrian mugikortasun esperientzia on honetaz gozatzeko.
Helburua ekimena 2021ean erabat martxan jartzea da. Une horretan, etorkizuneko Erasmus+ programan parte hartzen duten goi mailako hezkuntza erakundeek “Paperik gabeko Erasmus” sarea erabili beharko dute, ikasleen mugikortasun datuak trukatzeko. Erakundeentzat derrigorrezkoa izango da “Paperik gabeko Erasmus” sarea erabiltzea, egutegi honen arabera:
- 2021ean, ikaskuntza hitzarmenak kudeatzeko.
- 2022an, erakundeen arteko akordioak kudeatzeko.
- 2023an, ikasleen hautagaitzak eta onarpenak trukatzeko, baita beren mugikortasunarekin lotutako ziurtagiri akademikoak ere.
Parte hartzen duten erakundeek mugikorretarako Erasmus+ aplikazioaren erabilera sustatu beharko dute, administrazio prozeduren eraginkortasun handiagoa lortzeko, erakundeen eta ikasleen onuran. 2025erako, Europako ikasle guztiek gai izan beharko lukete Europako Ikasle Txartelaren abantailaz gozatzeko. Gehiago jakiteko, parte har ezazu “Erasmus digitalizatzen da” mintegian.
Abantailak
Txartela, Europar Batasuneko legeriarekin bat datorrena datu pertsonalen babesaren materian, ikasleen informazio trukaketa segurua bermatuko du eta goi mailako hezkuntzako erakundeen arteko trantsizio leuna ahalbidetuko du. Gainera, txartelak ikasleei ikastaroetara sartzeko aukera eskainiko die, baita goi mailako hezkuntzako beste erakunde batzuek eskaintzen dituzten lineako zerbitzuetan sartzeko ere.
Modu honetan, mugikortasun birtuala eta ikasketa mistoa errazteaz gain, ikasleek jarraitu ahal izango duten programa sorta zabalago bat izango dute. Denborarekin, Europako Ikasle Txartelak ere ikasleei aukera emango die Europa osoko kultur jardueretan parte hartzeko, prezio murriztuetan.
Ekimenaren abantailak ez dira ikasleetara mugatzen, izan ere administrazio prozedurak sinplifikatuko baititu eta goi mailako instituzioen administrazio zama murriztuko du, guztientzako mugikortasuna sustatuz.
Erasmus+ programaren eta “Europa Konektatu” Mekanismoaren finantzaketaren laguntzarekin, “Paperik gabeko Erasmus”, EMREX eta Europako Ikasle Txartela proiektu digitalak 2019tik aurrera zabalduko dira.
Europako Ikasle Txartela ekimena EBko araudiekin lotuta egongo da, identifikazio elektronikoari lotuta (eIDAS Araudia), beharrezko konfiantza finkatzeko, ikasleak autentifikatzeko eta haien eskubideak linean egiaztatzeko.
Beraz, ekimenak aurrerapauso bat suposatzen du gizarte europar digital baterako trantsizioan, eta benetako Europako Hezkuntzaren Espazio bat, non normalena izango den denboraldi bat atzerrian ikasten ematea eta hezkuntzan bikaintasuna errealitate bat izatea denontzat.
Ikasleentzat:
- Material didaktikoetara sarbide erraza toki-aldaketaren aurretik, ikasleentzako lineako erregistroa ikastaroetan eta ECTS kredituen aitorpen automatikoa.
- Berehala sartzea unibertsitate hartzailearen zerbitzuetan, hala nola liburutegietan, garraioan eta ostatuan.
- Deskontuak EBko jarduera kulturaletan.
Goi mailako hezkuntza erakundeentzat:
- Mugikortasun prozesu osoaren lineako kudeaketa sinplifikatua, ikasleen aukeraketatik ECTS kredituak aitortu arte.
- IIkasleak linean identifikatzea eta haien datuen truke sinplifikatua eta segurua -espediente akademikoak barne-, goi-mailako hezkuntza instituzioen artean.
- Ikasleen mugikortasunarekin lotutako zama administratiboa murriztea.