'Vermines' (2023) film frantsesak, Sébastien Vanícek zuzendariarenak, inauguratuko du urriaren 27an, Antzoki Zaharrean, Donostiako Fantasiazko eta Beldurrezko Zinemaren 34. Astea. Aurten urriaren 27tik azaroaren 3ra bitartean garatuko da, Antzoki Zaharrean eta Victoria Eugenia Antzokian, eta hiriko beste eszenatoki batzuetan.

Filmak, My Box Filmsek eta Tandemek ekoiztuak, duela egun batzuk itxi zuen Veneziako Zinemaldiko Kritikaren Nazioarteko Astea. Sébastien Vanícek zinemagileak zuzendutako lehenengo film luzea da, aurretik hainbat film labur egin ondoren, eta Théo Christine, Finnegan Oldfield, Sofia Lasaffre, Lisa Nyarko eta Jérôme Niel dira bertan protagonistak.

Fantasiazko generoko pelikula honek oinarri soziala du. Bertan, armiarma arriskutsuez osatutako talde bat ihesi dabil hiri handi bateko inguruetan.

Kaleb animalia exotikoekin liluratuta dagoen gazte bat da. Gau batean, bazar batean armiarma bat erosi eta bere apartamentura eramaten du, eta bere arrebarekin partekatzen du. Armiarma, oso pozoitsua, berehala ihes egin eta ugaltzen hasten da. Hala, tranpa hilgarri bihurtuko da eraikina; are gehiago, poliziak eraikina itxi eta Kaleb eta bere lagunak araknido hiltzaileen horda batekin harrapatuta geratzen direnean. Irteera bat aurkitzea izango da bizirik irauteko aukera bakarra.

Adso Films-ek banatuko du filma zinema-aretoetan.

Sail Ofizialeko Film Luzeak

• Cuando acecha la maldad (2023). Demian Rugna. Argentina. Herri txiki, urrun eta bakartu bateko biztanleek jakin dutenez, deabru bat jaiotzeko zorian dago “enbitxatu” baten gorputzean, eta inguruko bizimodu baketsua mehatxatzen du horrek. Ahalik eta azkarren suntsitzea erabakitzen dute, baina huts gehiegi egiten dituzte. Orain, bertatik ihes egin beharko dute, birus baten antzera Gaizkia bazter guztietatik zabaltzen ari den bitartean.
• Cuando los amos duermen (2023). Santiago Alvarado Ilarri. Espainia. Samuel eta Lourdes senar-emazte xume batzuk dira, eta dena ematen dute beren ugazaba Víctorren etxea eta lurrak zaintzen. Hura antzinako banpiro bat da, jende gaiztoaren odolaz bakarrik elikatzen dena. Belaunaldiz belaunaldi, Samuelen familia arduratu da ugazaba babesteaz, baina orain Samuel eta Lourdesek bi arazo dituzte: ez dute lortzen ondorengorik izatea, eta banpiro misteriotsu bat iristen da bertara bisitan. Santiago Alvarado Ilarrik zuzendutako hirugarren film luzea, 'Capa caída' (2015) eta 'Menéndez: El día del señor' (2019) filmen ondoren.