Patricia Fanlo Nafarroako Gobernuko Unibertsitate, Berrikuntza eta Eraldaketa Digitaleko sailburua Nafarroako Unibertsitatean izan zen otsailaren 26an, haren ikerketa- eta jasangarritasun-proiektuak ezagutzeko, BIOMA zentroa esaterako. Ana Burusco Unibertsitateko zuzendari nagusiak eta Agurtzane Martinez Zientzia, Teknologia eta Berrikuntzako zuzendari nagusiak lagunduta, Cimako instalazioetan ere ibili zen.

Bisita gobernu-taldearen batzar batekin hasi zen, eta bertan, María Iraburu errektoreak zentroari buruzko zenbait datu aurkeztu zituen, hala nola bere 7 campusetan 6.700 profesional baino gehiagok lan egiten dutela -haietatik, 4.472k Nafarroan- edo bere 16 fakultate eta ikastetxeetan 13.577 ikasle ikasten dute, 3.920 nazioarteko jatorrikoak.

Unibertsitate-gaietan, Unibertsitate, Berrikuntza eta Eraldaketa Digitaleko Sailak erakunde akademiko honekin duen lankidetza unibertsitate-ikasketetarako beken deialdi orokorra, udako ikastaroen urteko edizioa edo unibertsitateak egindako proiektuetarako diru-laguntza bezalako ekimenen bidez gauzatzen da.

Ikerketari dagokionez, errektoreak nabarmendu zuen Unibertsitateak bere ekoizpen zientifikoa areagotu duela azken bi hamarkadetan, ikerketa-zentro berriak abian jartzeari, ikerkuntza-karrera profesionalak garatzeari eta dirua erakartzeko gaitasuna areagotzeari esker. Halaber, 2025 Estrategiaren barruan, pertsonen eta ingurumenaren zaintzara bideratutako ikerketaren aldeko apustu berezia nabarmendu zuen, medikuntza pertsonalizatuan ardaztuta, gaixotasun onkologikoei, gaixotasun arraroei eta medikuntza aringarriei arreta berezia eskainiz.

Nafarroako Unibertsitatearen konpromiso hori Foru Exekutiboarenarekin ere bat dator, zeina Nafarroako Medikuntza Pertsonalizatuaren 2020-2030 Estrategia Integralean zehazten dena eta paziente bakoitzari arreta zehatzagoa eta puntualagoa eskaini nahi diona, pertsona eskualdeko osasun arretaren erdian kokatuz. Ikerketa-karrerarako laguntzei dagokienez, Nafarroako Gobernuak beka desberdinak ditu, hala nola WIT doktoretza aurreko bekak; hauei esker, hainbat ikertzailek beren proiektuak garatzen dituzte Nafarroako Unibertsitatean osasunaren eta energiaren alorretan; edo ANDIA doktoretza ondoko laguntzak, zeinak. ahalbidetu dute, adibidez, ikertzaileak Datu Zientzia eta Adimen Artifizialaren Institutuko taldera sartzea.

Jarraian, BIOMA proiektuaren aurkezpenean parte hartu zuten, zeinak, Exekutibo zentralak ere lagunduta, diziplina anitzeko eta ikerketa aplikatua sustatzen baitu Biodibertsitatearen eta Ingurumenaren Institutuaren bitartez, irakaskuntza, ekintzailetza eta dibulgazioa, Zientzia Museoaren bitartez. Women for Science and Technology ere ezagutu zuten, STEM arloetan emakumeen bikaintasun profesionala sustatzea helburu duten Zientzia fakultateetako emakume talde baten ekimena.

Nafarroa, lankidetza publiko-pribatuari esker lehiakorra
Azkenik, Cima bisitatu dute bertako zuzendari nagusi José Andrés Gómez Canterorekin batera. Nafarroako Gobernuak Ciman egindako ikerketarekiko duen konpromisoa Hezkuntza, Industria, Osasun eta Unibertsitate, Berrikuntza eta Eraldaketa Digitaleko departamentuen deialdi ezberdinetako proiektuen bidez islatzen da. Ibilaldian, azken urteotako kontzesioen bilakaera eta Departamentu honek Investigo Kontratuetan, Lankidetza Proiektuetan (Navarrabiomed eta SINAIko beste eragile batzuekin) eta IdisNAko kide gisa egindako ekarpenen datuak aurkeztu ziren, besteak beste. 2023an, Cimako Unibertsitate, Berrikuntza eta Eraldaketa Digitaleko Sailaren laguntza hauek 3 milioi euro ingurukoak ziren eta, besteak beste, minbiziari, gaixotasun kardiobaskularrei edo arnas infekzio kronikoen tratamenduari buruzko ikerketak finantzatu zituzten.