Egun, 300 bat enpresak osatutako sarea du Mondragon Unibertsitateak, bere ikerkuntza- eta transferentzia-proiektuak gauzatzeko. 

Era berean, azpimarratzekoa da ikasleen enplegatze-tasa, % 95ekoa baita graduetan eta unibertsitate-masterretan, eta % 100ekoa doktorego-programetan.

Bestalde, garrantzi handikoa da prestakuntza duala ere, Mondragon Unibertsitateak ia 60 urte baitaramatza eredu horretan lan egiten -Alecop sortu zenetik, hain zuzen- eta, horrenbestez, Euskadiko liderra da arlo horretan. Hain zuzen, unibertsitateak 22 titulu ematen ditu modalitate dualean, eta ikasleen % 68 inguruk aukeratzen du prestakuntza-mota hori. Hori dela eta, Europako lehen unibertsitate-sare dualaren buru da European Universities ekimenaren barruan (EU4DUAL proiektua). Lidergo horri esker, Euskadi nazioarteko erreferentziako herrialdea izango da prestakuntza dualaren esparruan. 

Horrez gain, nazioarteko eta Estatuko hainbat unibertsitate-sailkapenetan nabarmentzen da Mondragon Unibertsitatea, hala nola ezagutzaren transferentzia, ikerkuntza, irakaskuntza eta enplegagarritasuna aintzat hartzen dituzten ardatzetan. Adibidez, Europako Batzordearen U-Multirank sailkapenak -munduan unibertsitate-sailkapen nagusi eta zehatzena omen da- aintzat hartzen dituen bost arloetako hamar parametrotan bikaintzat hartzen dituen Espainiako bost unibertsitateetako bat da Mondragon Unibertsitatea.

Ildo horretan, nabarmentzekoa da Unibertsitatea estatu-mailako bigarren postuan dagoela ikasleen mugikortasunari dagokionez. Halaber, ezagutzaren transferentziaren esparruan, estatu-mailako seigarren postuan dago. 

Bere eskualdean (Euskadin) eragin sozioekonomikorik handiena duen unibertsitatea da, eta estatuko zazpigarrena, U-Multiranken arabera.

• 1943. Eskola Profesionala, gaur egungo Goi Eskola Politeknikoa.
• 1960. ETEO, gaur egungo Enpresagintza Fakultatea.
• 1966. Alecop. Prestakuntza dualaren hastapenak.
• 1973. Ikerlan. Lehen zentro teknologikoa.
• 1976. Irakasle eskola, gaur egungo Humanitate eta Hezkuntza Zientzien Fakultatea.
• 1984. Saiolan. Ekintzailetza-eta aktibitate berrien zentroa.
• 1997. Mondragon Unibertsitatea. 
• 2011. Gastronomia Zientzien Fakultatea. 
• 2023. Mondragon Unibertsitatearen 25. urteurrena.