EHUazoka, Euskal Herriko Unibertsitatearen Unibertsitate Orientazioko Azoka, 11.500 bisitari hartu zituen guztira, pandemia baino lehenagoko datuak gaindituz. Azoka Bizkaiko Campusean amaitu zen, Gipuzkoako eta Arabako Campusetatik igaro ondoren. Informazio-saioetan ere parte-hartzaile ugari izan zen. 14.000 plaza bete ziren, pertsona batzuk saio bat baino gehiagotara joan baitziren. Unibertsitate Orientazioko Azokak aukera paregabea eskaintzen die batxilergoko ikasleei gertutik ezagutzeko euskal unibertsitate publikoak 2023-2024 ikasturtean eskainiko dituen graduko ikasketak, bai eta unibertsitatera sartzeko prozedura osoa ere.

Euskal Herriko Unibertsitateko Ikasleen eta Enplegagarritasunaren arloko errektoreorde Fernando Tapiak orientazio-jardunaldi horien garrantzia azpimarratu du. “Hiru jardunaldietan egiaztatu ahal izan dugunez, EHUazokak berebiziko garrantzia du unibertsitate aurreko ikasleek beren hezkuntza- eta lanbide-ibilbidea beren itxaropen pertsonalen arabera diseinatu ahal izan dezaten. Izan ere, milaka familiek eta, bereziki, etorkizuneko unibertsitate-ikasleak izango diren milaka gazteek beren aukerak baloratzeko behar dituzten tresnak bertatik bertara ezagutu ahal izan dituzte, eta, horrela, beren gaitasunetara eta interesetara ondoen egokitzen den titulazioa behar bezala aukeratu ahal izan dute. Euskal Herriko Unibertsitatean oso pozik gaude, formatu egokituko bi edizioren ostean, ikasle gazteenei arreta eta laguntza eskaini diegulako une garrantzitsu honetan.”

EHUazoka Euskal Herriko Unibertsitateak urtero Sarbide Programaren barruan egiten dituen jardueren barruan kokatzen da, unibertsitate aurreko ikasleek beren ikasketak aukeratu aurretik ahalik eta informazio gehien izan dezaten. Programa horren barruan sartzen dira, halaber, unibertsitate aurreko ikasleek martxoaren 17tik 25era bitartean egingo diren Ate Irekien Jardunaldietan parte hartzea, eta unibertsitate aurreko ikasleek beren intereseko graduekin lotutako Jarduera Praktikoak egitea (ikasleek aktiboki parte hartzen duten eta titulazioei buruzko ezagutzak hobetzen dituzten unibertsitate-ikastetxeetan egiten diren jarduerak dira). Jarduera horiek maiatzaren 29tik ekainaren 23ra bitartean egingo dira.